Baz blog

غزل

08.11.2007 14:21

قدر يې زيات شو چې ستي شو په شرر منگی
ځکه يې پيغلې جينکۍ اوس وړي په سر منگی

له پښو نه سره پورې واخلي خوشبويي د جونو
کلاله څرنگ دې جوړ کړی په هنر منگی

غوږ يې د زړه درزا ته ايښی وي په ترخ کې د يار
له پټو زړونو باخبر وي بې خبر منگی

په ډکيدو کې چې خټ حټ په خندا وخنديږي
مظاهره کړي د وصال په مازيگر منگی

مور ته به څه بهانه کوې ته لا وړه يې گلې
چې د اشنا سره دې مات کړ په گودر منگی

عابده کاش چې ته کلال وای جوړول دې منگي
له خپلې خټې نه دې جوړ وای د دلبر منگی